വയനാട് കളക്ടറേറ്റിൽ നവകേരള സദസ്സിനെതിരെ ഭീഷണി കത്ത്: പോലീസ് അന്വേഷണം തുടങ്ങി

വയനാട് കളക്ടറേറ്റിൽ നവകേരള സദസ്സിനെതിരെ ഭീഷണി കത്ത്. സി.പി.ഐ. എം.എൽ. എന്ന പേരിൽ നവ കേരള സദസ് നടത്താൻ അനുവദിക്കില്ലെന്ന മുന്നറിയിപ്പുമായിട്ടാണ് കത്ത് ലഭിച്ചത്. കത്ത് ജില്ലാ പോലീസ് മേധാവിക്ക് കൈമാറി. പോലീസ് അന്വേഷണം തുടങ്ങി.
ഇന്ന് രാവിലെ 11 മണിയോടെയാണ് രണ്ടുപേജ് ഉള്ള കത്ത് തപാൽ മാർഗം വയനാട് കളക്ടറേറ്റിലെത്തിയത് അതേസമയം കത്ത് ലഭിച്ചുവെന്ന് സ്ഥിരീകരിച്ചെങ്കിലും മാവോയിസ്റ്റുകളുടേതാണ് എന്ന കാര്യത്തിൽ പോലീസിൽ നിന്ന് ഇതുവരെ സ്ഥിരീകരണം ഉണ്ടായിട്ടില്ല. നിലവിലെ സാഹചര്യത്തിൽ ആരെങ്കിലും കബളിപ്പിക്കാനായി കത്തയച്ചതാണോ എന്ന സംശയവും പോലീസിനുണ്ട്. സംഭവത്തിൽ പോലീസ് അന്വേഷണം ആരംഭിച്ചിട്ടുണ്ട്. കൽപ്പറ്റ ,മാനന്തവാടി ഡി.വൈ.എസ്.പിമാരുടെ നേതൃത്വത്തിലാണ് അന്വേഷണം. നവ കേരള സദസ് നടക്കുന്ന മൂന്നു കേന്ദ്രങ്ങളിലും സുരക്ഷ ഉറപ്പാക്കാൻ നേരത്തെ പോലീസിന് നിർദ്ദേശം ലഭിച്ചിട്ടുണ്ട്. ഈ സാഹചര്യത്തിൽ സദസ്സുകളിലെല്ലാം പ്രത്യേക സുരക്ഷാ സംവിധാനങ്ങളാണ് ഏർപ്പെടുത്തിയിരിക്കുന്നത്. ജില്ലക്ക് പുറമെ നിന്നും കൂടുതൽ പൊലീസുകാരെയും വിവിധ സേനാംഗങ്ങളെയും വയനാട്ടിൽ നിയോഗിച്ചിട്ടുണ്ട്. കത്തിൻമേൽ ഇൻ്റലിജൻസ് അന്വേഷണവും നടക്കുന്നുണ്ടെന്ന് ജില്ലാ പോലീസ് മേധാവി പദം സിംഗ് പറഞ്ഞു.