കൽപ്പറ്റ:
വയനാട്ടിലെ അതിപുരാതന ക്ഷേത്രമായ മുട്ടിൽ ശ്രീ സന്താനഗോപാല മഹാവിഷ്ണു വേട്ടക്കരുമൻ ക്ഷേത്രത്തിൽ സപ്തശത മഹാ ചണ്ഡികായാഗം ജൂലൈ 29, 30 തിയതികളിൽ ക്ഷേത്ര ഹാളിൽ നടത്തുമെന്ന് ഭാരവാഹികൾ വാർത്ത സമ്മേളനത്തിൽ അറിയിച്ചു. മൂകാംബിക ക്ഷേത്രത്തിലെ പ്രധാന അർച്ചകൻ ശ്രീ പരമേശ്വര അഡിഗയുടെ മുഖ്യകാർമികത്വത്തിലാണ് യാഗം നടക്കുക.
പൂർണ്ണമായി ജനകീയ സമിതിയുടെ നേതൃത്വത്തിൽ പ്രവർത്തിക്കുന്ന ക്ഷേത്രത്തിൽ പ്രധാന ചടങ്ങുകളിലൊന്നാണ് ചണ്ഡികാ യാഗം. സുമംഗലി പൂജ, കന്യാദാനം, ദാമ്പത്യ പൂജ എന്നിവയും ഇതോടൊപ്പം നടത്തുമെന്നും ഭാരവാഹികൾ അറിയിച്ചു. ജൂലൈ 29 ന് വൈകുന്നേരം 6 മണിയ്ക്ക് സങ്കല്പ പൂജയോടെ ആരംഭിക്കുന്ന യാഗം 30 ന് ഉച്ചയ്ക്ക് ഒരുമണിയോടുകൂടി അവസാനിക്കുന്ന രീതിയിലാണ് തീരുമാനിച്ചിരിക്കുന്നതെന്ന് ഭാരവാഹികൾ പറഞ്ഞു.
ക്ഷേത്ര സമിതി പ്രസിഡൻറ് എം.പി അശോക് കുമാർ , വൈസ് പ്രസിഡൻറ് കെ രാംദാസ് , ഭരണസമിതി അംഗം ചാമിക്കുട്ടി എന്നിവർ വാർത്താ സമ്മേളനത്തിൽ പങ്കെടുത്തു.
