സ്ത്രീ ശാക്തീകരണം ലക്ഷ്യം; സുദൃഢം ക്യാമ്പെയ്ന്‍ പരോഗമിക്കുന്നു

കൽപ്പറ്റ:
കുടുംബശ്രീയില്‍ ഇനിയും അംഗത്വം എടുക്കാത്തവര്‍ക്ക് അംഗമാകാനുള്ള അവസരം ഒരുക്കുന്ന സുദൃഢം ക്യാമ്പെയ്ന്‍ ജില്ലയില്‍ പുരോഗമിക്കുന്നു. ജില്ലയിലെ മുഴുവന്‍ സി.ഡി.എസ്തലത്തിലും പൊതുസഭകള്‍ പൂര്‍ത്തിയാക്കി പുതിയ 70 അയല്‍കൂട്ടങ്ങള്‍ രൂപീകരിച്ചു. കുടുംബശ്രീയുടെ 25 ാം വാര്‍ഷികാഘോഷങ്ങളുടെ ഭാഗമായിട്ടാണ് കുടുംബശ്രി മിഷന്‍ ക്യാമ്പെയ്ന്‍ നടത്തുന്നത്. പുതിയ അയല്‍ക്കൂട്ടങ്ങള്‍ രൂപീകരിക്കുക, പുതിയ അയല്‍ക്കൂട്ടാംഗങ്ങളെ ഉള്‍പ്പെടുത്തുക, നിഷ്‌ക്രിയമായ അയല്‍ക്കൂട്ടങ്ങളെ പ്രവര്‍ത്തന സജ്ജമാക്കുക, അയല്‍ക്കൂട്ട അംഗങ്ങളില്‍ കണക്കെഴുത്ത് പരിശീലനം നടത്തുക തുടങ്ങിയവയാണ് കാമ്പയിന്റെ പ്രധാന ലക്ഷ്യങ്ങള്‍. ഒക്ടോബര്‍ 5 വരെയാണ് ക്യാമ്പെയ്ന്‍. പുതുതായി ചേരുന്ന ആളുകളുടെ വിവരങ്ങള്‍ ദേശീയ ഉപജീവന മിഷന്റെ പോര്‍ട്ടലില്‍ ചേര്‍ക്കും. സിഡിഎസ് ,എഡിഎസ് തലങ്ങളില്‍ യോഗം ചേര്‍ന്ന് സര്‍വേ നടത്തിയാണ് പുതിയ അംഗങ്ങളെ തിരഞ്ഞെടുക്കുന്നത്. സെപ്റ്റംബര്‍ 30 ന് മുന്‍പായി ക്യാമ്പെയ്ന്‍ പൂര്‍ത്തീകരിച്ച് റിപോര്‍ട്ട് സംസ്ഥാന മിഷന് കൈമാറാനാണ് ജില്ലാ മിഷന്‍ ലക്ഷ്യമിടുന്നത്.
കുടുംബശ്രി ജില്ല മിഷന്‍ കോര്‍ഡിനേറ്റര്‍ പി.കെ ബാലസുബ്രമണ്യന്‍, അസിസ്റ്റന്റ് ജില്ല മിഷന്‍ കോര്‍ഡിനേറ്റര്‍ വാസു പ്രദീപ്, ജില്ല പ്രോഗ്രാം മാനേജര്‍മാര്‍ എന്നിവരുടെ നേതൃത്വത്തിലാണ് ക്യാംപയിന്‍ പ്രവര്‍ത്തനം. സിഡിഎസ്‌കളില്‍ പുതിയ അയല്‍ക്കൂട്ടങ്ങള്‍, വയോജനങ്ങള്‍ക്കായി മെഡിക്കല്‍ ക്യാമ്പുകള്‍, അയല്‍കൂട്ട അംഗങ്ങള്‍ക്ക് ഇന്‍ഷൂറന്‍സ് എന്‍ട്രോള്‍മെന്റ് മേളകള്‍ എന്നിവയും ക്യാമ്പെയ്ന്റെ ഭാഗമായി സംഘടിപ്പിക്കും.
*സ്‌പോട്ട് അഡ്മിഷന്‍*
മാനന്തവാടി ഗവണ്മെന്റ് കോളേജില്‍ ബി.എസ്.സി ഫിസിക്‌സ്, ബി.എസ്.സി ഇലക്ട്രോണിക്‌സ് കോഴ്‌സില്‍ എസ്.സി/ എസ്.ടി സംവരണ സീറ്റുകളില്‍ ഒഴിവുണ്ട്. താല്‍പര്യമുള്ളവര്‍ ഓണ്‍ലൈന്‍ അപേക്ഷയുടെ പകര്‍പ്പു സഹിതം സെപ്തംബര്‍ 30 വൈകിട്ട് 5 നകം കോളേജില്‍ നേരിട്ടെത്തി അപേക്ഷ സമര്‍പ്പിക്കണം. ഫോണ്‍: 04935 240351.
*സീറ്റൊഴിവ്*
മീനങ്ങാടി ഐ.എച്ച്.ആര്‍.ഡി മോഡല്‍ കോളേജില്‍ ബികോം കമ്പ്യൂട്ടര്‍ ആപ്ലിക്കേഷന്‍, ബി.എസ്.സി കമ്പ്യൂട്ടര്‍ സയന്‍സ് എന്നീ കോഴ്സുകളില്‍ ഏതാനും സീറ്റൊഴിവുണ്ട്. എ.സി/എസ്.ടി/ ഒ.ഇ.സി / ഒ.ബി.എച്ച് വിദ്യാര്‍ത്ഥി കള്‍ക്ക് ഫീസിളവ് ലഭിക്കും. അപേക്ഷകര്‍ ഒറിജിനല്‍ സര്‍ട്ടിഫിക്കറ്റു കളുമായി കോളേജില്‍ നേരിട്ട് ഹാജരാകണം. ഫോണ്‍. 9747680868, 8547005077.