തണ്ണീർ കൊമ്പൻ ചെരിഞതോടെ ആന ദൗത്യം വൻ വിവാദത്തിലേക്ക് : കേന്ദ്ര വനം പരിസ്ഥിതി മന്ത്രാലയത്തിലേക്ക് പരാതി പ്രവാഹം.

മാനന്തവാടി: തണ്ണീർ കൊമ്പൻ ചെരിഞതോടെ ആന ദൗത്യം വൻ വിവാദത്തിലേക്ക് : കേന്ദ്ര വനം പരിസ്ഥിതി മന്ത്രാലയത്തിലേക്ക് പരാതി പ്രവാഹം. സമഗ്ര അന്വേഷണം വേണമെന്ന് വിവിധ സംഘടനകൾ. വനം മന്ത്രിയെ പരിഹസിച്ച് സമൂഹ മാധ്യമങ്ങൾ. പ്രതിരോധിച്ച് മന്ത്രിയുടെ പാർട്ടി.കേന്ദ്ര സർക്കാർ അന്വേഷണം പ്രഖ്യാപിക്കാൻ സാധ്യത. വെള്ളിയാഴ്ച പകൽ മാനന്തവാടി നഗരത്തിൽ ആനയിറങ്ങിയതു മുതൽ ആനയെ മയക്കുവെടിവെച്ച് പിടികൂടണമെന്നാവശ്യപ്പെട്ട് ജനം വനം വകുപ്പിനെ സമ്മർദ്ദത്തിലാക്കിയിരുന്നു. സമൂഹത്തിൻ്റെ നാനാതുറകളിൽപ്പെട്ടവർ വനം മന്ത്രി എ കെ ശശീന്ദ്രനെയും സമ്മർദ്ദത്തിലാക്കി. ഇതോടെ അവധിയിലായിരുന്ന മുഖ്യവനപാലകൻ്റെ അവധി പിൻവലിച്ചാണ് ആനയെ മയക്കുവെടി വെക്കാൻ ഉത്തരവിറങ്ങിയത്. വൈകുന്നേരം അഞ്ചരയോടെ മയക്ക് വെടി വെക്കുകയും രാത്രി പത്തരയോടെ തണ്ണീർ കൊമ്പനെ ബന്ദിപ്പൂരിലേക്ക് കൊണ്ട് പോവുകയും ചെയ്തു. തണ്ണീർ കൊമ്പൻ ദൗത്യം വിജയകരമായതോടെ ദൗത്യസംഘത്തിന് അഭിനന്ദ ന പ്രവാഹവുമായി.എന്നാൽ നേരം ഇരുട്ടി വെളുത്തപ്പോൾ തണ്ണീർ കൊമ്പൻ ചരിഞ്ഞ വാർത്ത പുറത്തുവന്നതോടെ അഭിനന്ദിച്ചവരെ നേരെ തിരിഞ്ഞു. പിന്നെ ,പരാതികളും പരിഹാസവുമായി .പല കോണുകളിൽ നിരവധി പരാതികൾ ഉയർന്നതോടെയാണ് കേരള – കർണാടക സർക്കാരുകൾ സംഭവത്തിൽ അന്വേഷണം പ്രഖ്യാപിച്ചത്. ഇതോടെ വിവാദവും കത്തി തുടങ്ങി.കേന്ദ്ര വനം പരിസ്ഥിതി മന്ത്രാലയത്തിലേക്കാണ് ഏറ്റവും കൂടുതൽ പരാതി പോയിട്ടുള്ളത്. മന്ത്രിക്കെതിരെയും വനംവകുപ്പിനെതിരെയും പ്രതിരോധിക്കുകയാണ് മന്ത്രി എ.കെ.ശശീന്ദ്രൻ്റെ പാർട്ടിയായ എൻ.സി.പി.. മന്ത്രിയെ സമ്മർദ്ദത്തിലാക്കി മയക്കുവെടി വെക്കാൻ ഉത്തരവ് പുറത്തിറക്കുകയായിരുന്നുവെന്ന് എൻ.സി.പി ജില്ലാ പ്രസിഡണ്ട് ഷാജി ചെറിയാൻ പറഞ്ഞു. കേരളത്തിൽ നിന്നും കർണാടകത്തിൽ നിന്നും നിരവധി പരാതികൾ കിട്ടിയതോടെ സംഭവത്തിൽ കേന്ദ്ര തലത്തിൽ അന്വേഷണം നടക്കാനാണ് സാധ്യത. ഇതിനിടെയാണ് ഹൃദയാഘാതമാണ് മരണകാരണമെന്ന് പോസ്റ്റ് മോർട്ടത്തെ തുടർന്നുള്ള പ്രാഥമിക നിഗമനം വന്നിട്ടുള്ളത്.