ഒക്ടോബർ 29: ലോക സ്ട്രോക്ക്‌ ദിനം

ഒക്ടോബർ 29 ലോക സ്ട്രോക്ക്‌ ദിനം: പക്ഷാഘാതത്തെ കുറിച്ചുള്ള ബോധവൽക്കരണം ലക്ഷ്യമാക്കി ലോകാരോഗ്യ സംഘടന ഒക്ടോബർ 29 ന് ലോക സ്ട്രോക്ക്‌ ദിനം ആചരിക്കുന്നു. ഈ രോഗത്തെ കുറിച്ച് അവബോധം വളർത്തുന്നതിനും പ്രതിരോധ നടപടികൾക്കും സമയബന്ധിതമായ ചികിത്സയെകുറിച്ചും ഈ ദിനം നമ്മെ ഉദ്ബോധപെടുത്തുന്നു. ലോകാരോഗ്യ സംഘടനയുടെ കണക്കനുസരിച്ച് അസുഖം മൂലം ലോകത്ത് നടക്കുന്ന മരണകാരണങ്ങളിൽ പ്രധാനി പക്ഷാഘാതമാണ്. ജീവിത ശൈലിയിൽ മാറ്റം വരുത്തുക വഴി പക്ഷാഘാത സാധ്യത കുറയ്ക്കാൻ സാധിക്കും. പ്രായം, ലിംഗം, പാരമ്പര്യഘടകങ്ങൾ ഇവയൊന്നും നമുക്ക് നിയന്ത്രിക്കാനാവില്ലെങ്കിലും ആരോഗ്യകരമായ ഭക്ഷണരീതി പിന്തുടരുന്നത് വഴി പക്ഷാഘാതം തടയാൻ സഹായിക്കും. പഴങ്ങൾ, പച്ചക്കറികൾ, മുഴുധാന്യങ്ങൾ, ലീൻപ്രോട്ടീൻ ഇവ ധാരാളം അടങ്ങിയ ഭക്ഷണം കഴിക്കണമെന്നും പൂരിത കൊഴുപ്പുകൾ, ട്രാൻസ്‌ഫാറ്റുകൾ, ഉപ്പ്,പഞ്ചസാര എന്നിവയുടെ ഉപയോഗം കുറയ്ക്കണമെന്നും ഡബ്ല്യു.എച്ച്.ഒ നിർദേശിക്കുന്നു. പക്ഷാഘാതത്തിന്റെ ലക്ഷണങ്ങൾ നേരത്തെ തിരിച്ചറിയുന്നത് ഫലപ്രദമായ ചികിത്സയ്ക്ക് സഹായിക്കും. മുഖം കോടുക,കൈ കാലുകൾക്ക് ബലക്കുറവ് അനുഭവപ്പെടുക, സംസാരിക്കാൻ പ്രയാസം, കാഴ്ച്ച നഷ്ടപ്പെടുക, ബാലൻസ് നഷ്ടപ്പെടുക എന്നീ ലക്ഷണങ്ങൾ കണ്ടാൽ രോഗിയെ എത്രയും വേഗം ആശുപത്രിയിൽ എത്തിക്കുക. ലക്ഷണങ്ങൾ പ്രകടമായി ആദ്യ മണിക്കൂറുകൾ രോഗലക്ഷണങ്ങൾ തിരിച്ചറിഞ്ഞ് എത്രയും വേഗം വൈദ്യസഹായം തേടുന്നത് രോഗം സുഖപ്പെടാനുള്ള സാധ്യത കൂട്ടുമെന്ന് ഡോ. മൂപ്പൻസ് മെഡിക്കൽ കോളേജ് ന്യൂറോസർജറി വിഭാഗം സീനിയർ സ്പെഷ്യലിസ്റ്റ് ഡോ. ശ്രീരാജ് കെ പറഞ്ഞു. സ്ട്രോക്ക് അപകടസാധ്യതകൾ മനസ്സിലാക്കുകയും രോഗലക്ഷണങ്ങൾ ഉടനടി തിരിച്ചറിയുകയും ഉടനടി വൈദ്യസഹായം തേടുകയും ചെയ്യേണ്ടതിന്റെ പ്രാധാന്യത്തിന്റെ ശക്തമായ ഓർമ്മപ്പെടുത്തലാണ് ഈ ദിനം.