നല്ലൂര്‍നാട് ട്രൈബല്‍ ഹോസ്പിറ്റലില്‍ പൂങ്കാവനം പദ്ധതി ഉദ്ഘാടനം ചെയ്തു

നല്ലൂര്‍നാട് ട്രൈബല്‍ ഹോസ്പിറ്റലില്‍ പരിസ്ഥിതി ദിനത്തോട് അനുബന്ധിച്ച് പൂങ്കാവനം പദ്ധതി മാനന്തവാടി ബ്ലോക്ക് പഞ്ചായത്ത് പ്രസിഡന്റ് ജസ്റ്റിന്‍ ബേബി ഉദ്ഘാടനം ചെയ്തു. മാനന്തവാടി ബ്ലോക്ക് പഞ്ചായത്തും നാഷണല്‍ ആയുഷ് മിഷനും സംയുക്തമായി സംഘടിപ്പിച്ച പരിപാടിയില്‍ ബ്ലോക്ക് പഞ്ചായത്ത് ആരോഗ്യ സ്റ്റാന്‍ഡിങ് കമ്മിറ്റി ചെയര്‍പേഴ്സണ്‍ പി. കല്യാണി അധ്യക്ഷത വഹിച്ചു. പൂങ്കാവനം പദ്ധതിയില്‍ എഴുപതിലധികം ഇനം ഔഷധ സസ്യങ്ങള്‍ ജനപ്രതിനിധികളും ആശുപത്രി ജീവനക്കാരും, ഹ്യുമാനിറ്റി ഫസ്റ്റ് എന്ന എന്‍.ജി.ഒയും ചേര്‍ന്ന് ആശുപത്രി പരിസരത്ത് തൈകള്‍ നട്ടു. വികസനകാര്യ സ്റ്റാന്‍ഡിംഗ് കമ്മിറ്റി ചെയര്‍മാന്‍ കെ.വി. വിജോള്‍, ഡെപ്യൂട്ടി ഡി.എം.ഒ ഡോ. പ്രിയ സേനന്‍, സൂപ്രണ്ട് ഡോ. ആന്‍സി മേരി ജേക്കബ്, ഡോ. സിജോ കുര്യാക്കോസ്, സ്റ്റാഫ് കൗണ്‍സില്‍ സെക്രട്ടറി മിഥുന്‍ ലോഹിദാക്ഷന്‍ തുടങ്ങിയവര്‍ സംസാരിച്ചു.
*പച്ചതുരുത്ത് സന്ദര്‍ശിച്ചു*
ലോക പരിസ്ഥിതി ദിനത്തില്‍ നവകേരളം കര്‍മപദ്ധതിയില്‍ ഹരിത കേരളം മിഷന്‍, കണിയാമ്പറ്റ ഗ്രാമപഞ്ചായത്ത്, മഹാത്മ ഗാന്ധി ദേശീയ ഗ്രാമീണ തൊഴിലുറപ്പ് പദ്ധതി, കണിയാമ്പറ്റ ഗവ. മോഡല്‍ റസിഡെന്‍ഷ്യല്‍ സ്‌കൂള്‍ എന്നിവര്‍ സംയുക്തമായി പച്ചത്തുരുത്ത് സന്ദര്‍ശിച്ചു. കണിയാമ്പറ്റ പഞ്ചായത്തിലെ അഞ്ചാം വാര്‍ഡിലെ തേജ്വവനം പച്ചതുരുത്താണ് വിദ്യാര്‍ത്ഥികള്‍ സന്ദര്‍ശിച്ചത്. കണിയാമ്പറ്റ ഗ്രാമപഞ്ചായത്ത് പ്രസിഡന്റ് കമല രാമന്‍ തൈനട്ട് ഉദ്ഘാടനം ചെയ്തു. പഞ്ചായത്ത് ഭരണ സമിതി അംഗങ്ങള്‍, തൊഴിലുറപ്പ് ഉദ്യോഗസ്ഥര്‍, തൊഴിലുറപ്പ് തൊഴിലാളികള്‍, നവകേരളം കര്‍മപദ്ധതി ആര്‍.പിമാര്‍ തുടങ്ങിയവര്‍ പങ്കെടുത്തു.
*ടൗണ്‍ ശുചീകരിച്ചു*
പരിസ്ഥിതി ദിനാചരണത്തിന്റെ ഭാഗമായി മുപ്പൈനാട് പഞ്ചായത്ത്, ഡോ. മൂപ്പന്‍സ് മെഡിക്കല്‍ കോളേജ് കമ്മ്യൂണിറ്റി മെഡിസിന്‍ വിഭാഗം എന്നിവരുടെ സംയുക്താഭിമുഖ്യത്തില്‍ അരപ്പറ്റ ടൗണ്‍ ശുചീകരിച്ചു. ഗ്രാമ പഞ്ചായത്ത് പ്രസിഡന്റ് എ.കെ. റഫീഖ് ഉദ്ഘാടനം ചെയ്തു. ഡോ. മൂപ്പന്‍സ് മെഡിക്കല്‍ കോളേജ് കമ്മ്യൂണിറ്റി മെഡിസിന്‍ വിഭാഗം മേധാവി ഡോ. ബി.പി സുദര്‍ശന്‍ പ്ലാസ്റ്റിക്കിന്റെ ദൂഷ്യവശങ്ങള്‍, പ്ലാസ്റ്റിക് മലിനീകരണം തടയുന്നതിനു വ്യക്തി തലത്തിലും സമൂഹ തലത്തിലും സ്വീകരിക്കേണ്ട മാര്‍ഗ്ഗങ്ങള്‍ എന്നീ വിഷയങ്ങളില്‍ ക്ലാസ്സെടുത്തു. മുപ്പൈനാട് ലക്കി ഹില്‍ ജംഗ്ഷനില്‍ നിന്നും ആരംഭിച്ച ശുചീകരണത്തിന് മൂപ്പന്‍സ് മെഡിക്കല്‍ കോളേജിലെ മെഡിക്കല്‍ വിദ്യാര്‍ത്ഥികളും ഡോക്ടര്‍മാരും മറ്റു ജീവനക്കാരും നേതൃത്വം നല്‍കി. വാര്‍ഡ് മെമ്പര്‍മാരായ ഇ.വി ശശിധരന്‍, അഷ്‌കര്‍ അലി, കമ്മ്യൂണിറ്റി മെഡിസിന്‍ വിഭാഗത്തിലെ ഡോക്ടര്‍മാരായ ഡോ. ടി.പി ശ്രീലാല്‍, ഡോ. അപര്‍ണ മോഹന്‍ദാസ്, ഡോ. അനശ്വര അശോക്, ഡോ. വര്‍ഷ, ആസ്റ്റര്‍ വളണ്ടിയര്‍ പ്രതിനിധികള്‍ തുടങ്ങിയവര്‍ പങ്കെടുത്തു.
*മാമ്പഴക്കാലം പദ്ധതി തുടങ്ങി*
തരിയോട് ഗവ. ഹയര്‍ സെക്കന്‍ഡറി സ്‌കൂള്‍ നാഷണല്‍ സര്‍വീസ് സ്‌കീം യൂണിറ്റ് നടപ്പിലാക്കുന്ന മാമ്പഴക്കാലം പദ്ധതിക്ക് തുടക്കമായി. തരിയോട് ഗ്രാമപഞ്ചായത്ത് ആരോഗ്യ വിദ്യാഭ്യാസ സ്ഥിരം സമിതി അധ്യക്ഷന്‍ ഷമീം പാറക്കണ്ടി ഉദ്ഘാടനം ചെയ്തു. സ്‌കൂള്‍ പ്രിന്‍സിപ്പല്‍ എസ്. ശ്രീകല അധ്യക്ഷത വഹിച്ചു. ലോക പരിസ്ഥിതി ദിനത്തോടനുബന്ധിച്ച് ഐക്യരാഷ്ട്ര സഭയുടെ ആഗോള പദ്ധതിയായ മിഷന്‍ ലൈഫുമായി ബന്ധപ്പെട്ട് സുസ്ഥിര ഭക്ഷ്യ വ്യവസ്ഥ എന്ന ആശയം പ്രാവര്‍ത്തികമാക്കാന്‍ ലക്ഷ്യമിട്ട് കൊണ്ടുള്ള പദ്ധതിയാണ് മാമ്പഴക്കാലം. പദ്ധതിയുടെ ഭാഗമായി വിദ്യാര്‍ത്ഥികള്‍ മാമ്പഴ തൈകള്‍ നട്ടു പിടിപ്പിക്കുകയും അതോടൊപ്പം തന്നെ പൊതുജനങ്ങള്‍ക്ക് വിതരണം ചെയ്യുകയും ചെയ്യും. എന്‍.എസ്.എസ് പ്രോഗ്രാം ഓഫീസര്‍ ബി. അജിത്ത്, സ്റ്റാഫ് സെക്രട്ടറി മുഹമ്മദ് ബഷീര്‍, എന്‍.എസ്.എസ് വളണ്ടിയര്‍ ലീഡര്‍മാരായ അര്‍ജ്ജുന്‍ ശിവാനന്ദ്, എസ്. അളക തുടങ്ങിയവര്‍ നേതൃത്വം നല്‍കി.
*കര്‍ളാട് തൈകള്‍ നട്ടു*
ലോക പരിസ്ഥിതി ദിനത്തോടനുബന്ധിച്ച് കര്‍ളാട് ചിറയില്‍ തൈകള്‍ നട്ടു. ഡി.ടി.പി.സി, തരിയോട് ഗ്രാമ പഞ്ചായത്ത്, വനം വകുപ്പ്, തരിയോട് കൃഷി ഭവന്‍, താജ് ഇന്റര്‍നാഷണല്‍ എന്നിവരുടെ സംയുക്താഭിമുഖ്യത്തിലാണ് പരിപാടി സംഘടിപ്പിച്ചത്. തൈ നടീല്‍ പഞ്ചായത്ത് പ്രസിഡന്റ് വി.ജി ഷിബു ഉദ്ഘാടനം ചെയ്തു. വൈസ് പ്രസിഡന്റ് ഷീജ ആന്റണി, സ്ഥിരം സമിതി അധ്യക്ഷന്‍മാരായ രാധ പുലിക്കോട്, പുഷ്പ മനോജ് വാര്‍ഡ് മെമ്പര്‍മാരായ ചന്ദ്രന്‍ മടത്തുവയല്‍, സൂന നവീന്‍, വിജയന്‍ തോട്ടുങ്കല്‍, ബീന റോബിന്‍സണ്‍, താജ് ഇന്റര്‍നാഷണല്‍ മാനേജര്‍ ശ്രീജിത്ത് നായര്‍, കെ.വി ഉണ്ണികൃഷ്ണന്‍, കര്‍ളാട് തടാകം മാനേജര്‍ സുമ ദേവി, ഫോറസ്റ്റ് ഓഫീസര്‍ എം. ജയരാജ്, കൃഷി ഓഫീസര്‍ പി.കെ ഷിബു തുടങ്ങിയവര്‍ സംസാരിച്ചു.
തരുവണ ഗവ. ഹയര്‍സെക്കണ്ടറി സ്‌കൂളില്‍ എച്ച്.എസ്.ടി നാച്ചുറല്‍ സയന്‍സ്, എച്ച്.എസ്.ടി മാത്സ് എന്നിവയില്‍ ദിവസവേതനടിസ്ഥാനത്തില്‍ അധ്യാപക നിയമനം നടത്തുന്നു. ഉദ്യോഗാര്‍ത്ഥികള്‍ അസല്‍ സര്‍ട്ടിഫിക്കറ്റുകളുമായി ജൂണ്‍ 9 ന് രാവിലെ 9.30 ന് സ്‌കൂള്‍ ഓഫീസില്‍ കൂടികാഴ്ചക്ക് എത്തിച്ചേരണം.
*ലേലം*
വൈത്തിരി താലൂക്കിലെ കാവുമന്ദം വില്ലേജില്‍ ബ്ലോക്ക് നമ്പര്‍ 6 റീസര്‍വ്വെ നമ്പര്‍ 309/7ല്‍ ഉള്‍പ്പെട്ട 0.0405 ഹെക്ടര്‍ പുരയിടം ജൂലൈ 12 ന് രാവിലെ 11 ന് കാവുമന്ദം വില്ലേജ് ഓഫീസ് പരിസരത്ത് ലേലം ചെയ്യും.