‘ വയനാട്‌ വൻധൻ സ്പെെസസ് ’ അരുണമല കാട്ടുനായ്ക്കരുടെ ഏലം വിപണിയിലേക്ക്

മേപ്പാടി: അരുണമല കാട്ടുനായ്‌ക്ക വിഭാഗക്കാരുടെ കാർഷികോൽപ്പന്നങ്ങൾ പാക്കറ്റുകളിലായി വിപണിയിലെത്തുന്നു. ഇവരുടെ ഏലം, കുരുമുളക്‌ എന്നിവയാണ്‌ ആകർഷകമായ പാക്കറ്റുകളിലൂടെ വിൽപ്പനക്കെത്തുന്നത്‌. വനംവകുപ്പ്‌ സൗത്ത്‌വയനാട്‌ ഡിവിഷന്‌ കീഴിൽ ‘ വയനാട്‌ വൻധൻ സ്പെെസസ് ’ എന്ന പേരിലാവും ഇവ അറിയപ്പെടുക. ജില്ലയിൽ ഏറ്റവും കൂടുതൽ ഏലം കൃഷിയുള്ള മേഖലയാണ് അരുണമല മേഖല. കാട്ടുനായ്ക്ക വിഭാഗത്തിൽപ്പെട്ട നിരവധി കുടുംബങ്ങൾ ഏലം കൃഷിയിൽ മാത്രം ആശ്രയിച്ചാണ് ഉപജീവനം നടത്തുന്നത്. മതിയായ വില മിക്കപ്പോഴും ലഭിക്കാറുമില്ല. ഈ സാഹചര്യത്തിലാണ് മൂല്യവർധിത ഉൽപ്പന്നങ്ങളാക്കി വിപണിയിലെത്തിക്കാൻ വനംവകുപ്പ് അധികൃതർ ലക്ഷ്യമിടുന്നത്. പ്രധാനമന്ത്രി വൻധൻ വികാസ് കേന്ദ്ര പദ്ധതി മുഖേന സാമ്പത്തിക സഹായവും കണ്ടെത്തി. ഏലത്തിന് പുറമെ അരുണമലക്കാരുടെ കുരുമുളകും തരിയോട് എട്ടാംമെെൽ വർധൻ വികാസ് സ്വാശ്രയ സംഘാംഗങ്ങൾ ശേഖരിക്കുന്ന കാട്ടുതേനും സംസ്കരിച്ച് മിതമായ നിരക്കിൽ വിപണിയിലെത്തിക്കുന്നുണ്ട്. അരുണമലയിൽ നടന്ന ചടങ്ങിൽ മേപ്പാടി പഞ്ചായത്ത് പ്രസിഡന്റ് ഓമന രമേശ് ഉൽപ്പന്നങ്ങൾ പുറത്തിറക്കി. ചെമ്പ്രാപീക്ക് വനസംരക്ഷണ സമിതി പ്രസിഡന്റ് കെ എ അനിൽകുമാർ ഏറ്റുവാങ്ങി. മേപ്പാടി റെയിഞ്ച് ഓഫീസർ ഡി ഹരിലാൽ അധ്യക്ഷനായി. ബ്ലോക്ക് പഞ്ചായത്ത് അംഗം രാഘവൻ, വാർഡ് അംഗം രാധ, ഡിവിഷൻ കോ ഓർഡിനേറ്റർ എം മോഹൻദാസ്, പി കെ ജീവരാജ്, അരവിന്ദാക്ഷൻ കണ്ടോത്തുപാറ, സുന്ദരൻ, ബാബു എന്നിവർ സംസാരിച്ചു. സിയാദ്ഹസൻ സ്വാഗതവുംപി കെ രാജേഷ് നന്ദിയും പറഞ്ഞു.